 |
| KULTLAB: Frå venstre musikar Einar Olav Larsen, forskar Niels Arvid Sletterød, historieforteljar Johan Einar Bjerkem, teaterkunstnar Astrid S. Fuglesang, organisasjonssosiolog Trond Stiklestad og daglig leiar Torunn Hernes Bjerkem i Kultlab. Foto: Wow Foto. |
- Gjennom VRI Trøndelag vart vi sett i kontakt med Stiklestad, som har hjelpt oss å sette kunden sine behov i fokus, seier Torunn Hernes Bjerkem.
KultLab er eit selskap som skal levere leiarutvikling på ei kulturell plattform. Johan Einar Bjerkem, Torunn Hernes Bjerkem og fleire prosessleiarar med kulturell bakgrunn og utdanning skal gi leiarar frå næringslivet innsyn i musikk, dans og andre kulturelle uttrykk. Kunsten og kulturen har nemleg mykje til felles med leiarskap og gruppearbeid på ein arbeidsplass.
Visdom i dans og teater
- Dei verktøya vi bruker i kursa er historiefortelling, dans, teater og musikk, og det ligg mykje visdom i kvar av dei. Kursa våre går på teamutvikling, leiing, det å skape noko og på nærvær, fortel Torunn Hernes Bjerkem.
Frå før driv ekteparet bedrifta Bjerkem natur og kultur på garden Bjerkem i Henning. Dei to har brei erfaring frå både næringsliv og kulturliv, og dei har lenge tenkt på at teater, dans og musikk kan vere nyttige verktøy i arbeidslivet.
Reindyrkar kursverksemda
- Vi ville reindyrke kursbiten vår – for å gjere det tydelegare for kundane at det var noko anna enn ”gårdsturisme”. Vi såg at vi hadde behov for hjelp til merkevarebygging og utvikling av dette produktet – og sidan vi hadde god erfaring med kompetansemekling i mindre skala frå tidlegare, spurte vi VRI Trøndelag og kompetansemeklarane om hjelp til dette, seier Torunn Hernes Bjerkem.
Kompetansemeklaren hjelpte til med å koble KultLab saman med organisasjonssosiolog og høgskolelektor i økonomi Trond Stiklestad ved Høgskolen i Sør-Trøndelag. På den måten fekk dei profesjonell hjelp med å bli kundeorientert og lage noko som forhåpentlegvis treffer i marknaden.
Kundane sine behov
- Trond Stiklestad har hjelpt oss med å tydeleggjere kva kundane har behov for. Før har vi i for stor grad gått ut frå kva vi har å tilby. Trond har vore flink til å få oss gjennom ein prosess der vi har klart å sette behovet til kundane i fokus, seier Johan Einar Bjerkem.
Salet av kursa er allereie i gang, og saman med gode hjelparar både frå forsknings- og musikkverda ser dei to innehavarane av KultLab fram til å gi næringslivsleiarar og andre kundar kulturelle aha-opplevingar.
Ser ting i nytt lys
- Det handlar om å reflektere over og sjå på det ein gjer til dagleg i et nytt lys, og bli meir bevisst på at ein kan gjere seg nytte av at folk er ulike. Det får ein til på ein god måte gjennom til dømes dansen, seier Torunn Hernes Bjerkem.